قصص الاحامدة تحتاج بحث اكثر توجد قصائد

بسم الله الرحمن الرحيم

قصيدتي في قبيلتي (الاحمدي) وبدون قصور في باقي القبايل ونعم بالجميع

دق البروقي واشعر القلب بنذار =وصحّى صدى صوته خواطر خفيّه
متهيّض(ن) ناموس فكري بالاشعار=يطرب لها راعي العلوم النديّه
جالس خلاوي صافي الذهن محتار= وسط الخلا مع قهوة الشاذليّه
ان جيت ابنظم للقوافي والافكار=اسجّ مع روحي بروحه وجيّه
كتبت أبيات(ن)حوت بعض الاخبار=وفي مدح ربعي ما عليه خطيّه
ابيات تقرأ وبالتواريخ تندار=يقرونها الاجيال منّي هديّه
في نظمها مثل الدّرر وسط الابحار=غوّاصها دايم عزومه جريّه
وانا الذي ربعي طويلين الاشبار=من نسل طيب والنوايا مطيّه
دمّاحة الزلات في وقت الاخطار=وكسّابة المعروف عند البليّه
ياما اصلحوا بين القبايل بالاشوار=وميزانهم بالعدل مشعول ضيّه
ودلالنا تصلى على جاتب النار=وفينا الكرم موصوف طبع وسجيّه
وتاريخنا شامخ وحافل بالاذكار=ونفوسنا بالخير دايم زكيّه
ودخيلنا محفوظ من كل الاضرار=ونحفظ عهود(ن) مالها معذريّه
والاحمدي وليا جفى الوقت ما بار=صاين حقوق الخوي مع خويّه
والاحمدي محشوم في كل الاقطار=بين القبايل عالى المنزليّه
والاحمدي ما يقبل الذل والعار=وارواحنا بالعز هي مرتويّه
وشيوخنا من نسل حمران الانظار=تاريخهم محفوظ من كل سيّه
حي الشيوخ اللي لها الفخر محضار=فيها المكارم والعزوم القويّه
وذي لابتي وان صار بالوقت ما صار=ما تختلف هقواتها والحميّه
ربعي أهل فزعات في كل مذمار=ويمينهم بالحق دايم رويه
عند المحارب اعتلوا قب الامهار=موت(ن) بعز ولا حياة الرديّه
يوم العدو حبّر علينا بالاخطار=(بسقام) في جيش (ن) تسابق دويّه
جيش(ن) مزوّد بالمدافع والاشرار=اسقوه ربعي كاس مر المنيّه
خلّوه يرضخ شاوش الفكر منهار=في وقت فيه الموت يبرق صليّه
بارض(ن) تباهت بالمعاني والاسرار=من دونها الانفس تراخص فديّه
في عهد شيخ(ن) اعتلا المجد بصرار=ابن جزاء راع العلوم النقيّه
وام الطوال يومٍ ضحّت بالاخيار=اربع من الولدان راحوا ضحيّه
قالت عساهم فدوة الارض والدار=خنساء ربعي هذي الاحمديّه
والاحمدي له وقفة(ن) تجلي العار=يوم (ن) ابن ولمان حاز العليّه
عاف الحياه من قبل ما ياخذ الثار=جابه وفاز بقلب الشمريّه
هذي علوم اللي مع الوقت ما دار=تاريخ يحفظ من نبوع(ن) صفيّه
دهر(ن) من الامجاد تكتب بالاحبار=متواتر(ن) عند القبايل فليّه
ياعزوتي تكفون يا نسل الاحرار=رجل بلا ربعه حياته شقيّه
من تجربه ماهي هواجيس وافكار =شوف العراق وشوف مصر البهيّه
وحاولت اجنّب عن عسيرات واختار=وارقى ركابي ولا عليه زريّه
وياكثر ما فينا من الناس الاخيار=وكل(ن) بفعله كاسب الأفضليّه
واليوم حنّا في ذرآ حاكم الدار=وكل القبايل في نضرهم سويّه
وتبدلت عسم الليالي بالانوار=وصارت حياة الكل فيها هنيّه
وحنّا على البيعه ونومن بالاقدار= ورث الجدود الصدق والمقدريّه
قول(ن) عليه الحق ما فيه انكار=ما تنكره غير النفوس الخزيّه
ويالله يا مجري السحايب والامطار=تكرم لحى كل الرجال الوفيّه

الشاعر/ناصربن مصلح الاحمدي الحربي

السلام عليكم ورحمة الله وبركاته : بارك الله فيك أخي ناصر على هذه القصيدة الجميلة القوية المعاني المعبرة ..

لفت نظري أخي الكريم البيت القائل ( قالت عساهم قدوة الأرض والدار ___ خنساء ربعي هذي الأحمدية )
كأني بك تُرجع نسب الأحمدي إلى قبيلة بني سُليم والنعم بهم ، حيث الخنساء ( تماضر بنت عمرو الشريد ) الشاعرة المعروفة من قبيلة سُليم ، والأحمدي الذين ينتمون إلى جدهم ( حمد ) هم من قبيلة حرب بدون أدنى شك وجميع مشايخ الأحامدة وكبارهم يؤيدون ذلك ويؤكدونه ، ويمكنك تصفح موقع الأحامدة الرسمي لتظهر لك هذه الحقيقة ،

أشكرك جزيل على سعة صدرك وإذا كنتُ مخطئاً آمل منك التصويب ،،

أخوك / أبو محمد