من وسط رفحاء حرّك الجمس بكتاب = يلفي على اللي عادته هبت الريح
بندر حكيم الراي حلّال الأنشاب = شهمٍ بشوش وبالمهمات زحزيح
للنعم والنوماس والمدح كسّاب = وللطيب والنخوة بوجهه ملاميح
يا ريف من عضه زمانه بالأنياب = يا كشرت غبر السنين الشلافيح
تلقى بديوانه قريبين وأجناب = ينخاه من واجه بدربه سواميح
نرفع له البيضاء على رأس مرقاب = بروس الطوال العاليات اللواليح
أنت الذي منجوب من حسن الأطلاب =من روس قومٍ بالملاقى ذوابيح
نواحلٍ يوم أنها خيل واركاب = شهد لهم بالطيب راعي طليفيح
يالله لا تقطع عريبين الأنساب = أهل النداء بيض الوجيه المفاليح
حمـايـلٍ للملتـجي ستـر وحـجـاب = الله خلقهـم للمروة فلالـيـح
يا تيه الساري وضو القمر غاب = يا سعد منهم بالدجا له مصابيح
يا سكرت بوجيهنا صم الأبواب = لابواب فعل الخير معهم مفاتيح
ويا قلّت النخوة وبعض الرجاء خاب = وعاشت على الحيلة دموع التماسيح
لله نلجأ ثم نجعلهم أسباب = يا صار للغلطة مجالٍ وتصحيح
وكم خيّرٍ ذكره مع الناس ما غاب = لو كان حطو فوق قبره صلافيح