منتديات بني سالم ومسروح - رشيد الزلامي وشليويح بن شلاح المطيري(يا شليويح المطيري ضف عفشك ضفه)

رشيد الزلامي العتيـبي
و
شليويح بن شلاح المطيري
رشيـد الزلامي
يا شليويح المطيري ضف عفشك ضفه
***واحتزم فاحزامك الي فالزمان الماضي
هف مع ريح السلامه وجعلها اخر هفه
*** وانت زنبيلك على راسك وخرجك فاضي

شليويح بن شلاح
كف يالزلامي عن صحيبك كفه
***انت قاضي وش تسوي كان جاك القاضي
من يطول شاربه بالطيب ماحد حفه
***وان بغيت العلم الاخر ما تعود راضي

رشيـد الزلامي
بالتمني ما حد قدمك حصله شفه
***وانت في قلبك مرض من خيرة الامراضي
قبل خمس اسنين راسك داخل فالسقفه
***كيف جدالك بطن واكمام طوال عراضي

شليويح بن شلاح
شفتلي عفش منتثر مير بالله لفه
***قبل لا ترد الضوامي فوق صير الماضي
لا تلفت يم جارك خل عندك عفه
***يا عويض ما تجيب الحق من عواضي

رشيـد الزلامي
ولا ياذا الكنور الي كل يوم ندفه
***لو اباقف معك دايم ما قضيت اعراضي
انتهت صفه على راسك وباقي صفه
***مير تصدملك جبل والياك قاضي فاضي

شليويح بن شلاح
اروح البارود وارجع لاتقوم تسفه
***المطيري ما وراه عراش يالعضاضي
الزلامي شيخ مار اشتالها طفطفه
***لو يشيل المزوده يزري عن المنهاضي

رشيــد الزلامي
تعب ابو مطلق واخوه ابليس قام يزفه
***باخر الدنيا يخايل كل برق ناضي
لو يحب الكوع ويبين الشعر في كفه
***اشهدنه في زمان فات ما يعتاضي

شليويح بن شلاح
عدل الميزان لا ترجع عليك الكفه
***من يطول به المرض يدخل عضامه شاضي
كل ما حصلت لك قرطوع قمت تهفه
***ما بقى الا كود زبده خضها الخضاضي

رشيـد الزلامي
دق في قلبي علوم ورف رمشي رفه
***ودي احضر مع قريش الي بسوق عكاضي
والجمل خانه زمانه ما بقى الا جفه
***ما يوصلني وانا عندي لزوم حاضي

شليويح بن شلاح
هدو السرعه شويه لا تزيد الخفه
***يا وسيع المعرفه لا ينقص المركاضي
الجمل ما هو منوسن ينقلب باللفه
*** ما عليه خلاف المرباع والمقياضي
رشيد الزلامي
خذ جواز وخذ جهاز ورح مع اهل الضفه
***لا تقول البر بري والرياض رياضي