اقول عن سلطان في حفل سلطان=ابن عوض رجل الكرم والحمية
اهلا هلا بشيوخ وافراد واعيان=تحية التبجيل والمقدرية
ياهل الوفاء والطيب ذرفين الايمان =ياهل المواقف واليدين الندية
سلطان له في قمة المجد عنوان=صفحة حياته بالمكارم ملية
سلطان للي يشكي الضيم مزبان=له فزعتن تقصر حبال القضية
بالمرجلة والعز في كل ميدان=جاه و وجاه وسمعتن عالمية
وابوه قبله له مكانه وله شان=عند الرجال اهل الفعول الوفية
يقوله السامود سالم ضعيان=امخلفي من حرب والنار حية
في حرب راسي من ورا غر الامزان=ولي الشرف ولهم حقوقن عليه
حرب الحرايب من قديمات الازمان =اهل السعد بالدين والجاهلية
وكلن بفعل الطيب مافيه نقصان=وهد البخت مذموم عيب وخطيه
والله يعز الدار في حكم سلمان=الحاكم الي عز كل الرعيه
مية سنه وبلادنا بأمن وامان =الشعب وافي والحكومة وفيه
اعز شعب اطهر وطن بين الاوطان=يحكم بشرع الله وسنة نبيه
نعمة من الي خالقن كل الاكوان=ينعم بها شعبآ حياته هنيه
كل الدول صارت على كف شيطان =الا خليج شعوبنا اليعربيه
وباقي العرب بشعوبها ثار بركان =مصايبن تنهال من كل نيه
احزاب ذبح وسلب ارامل ويتمان =واعراض تهكت كل صبح وعشيه
وحكام روح حكمهم في خبر كان =وشعوبهم كلآ ركب له مطيه
هذاك يقتل ذاك والكل خسران=وام الدلع غنت لهم سامريه
تساعد السنه على شيعة ايران=وتحارب السنه مع الرافضيه
وتلعب على الحبلين لفلان وفلان =وليا انتهت لقتهم الجرهديه
وياشعب ياشعب الكرامه والايمان=النور واضح والحقيقه جليه
الشكر للنعمة يبي عقل واتقان=ومن لا شكر راحت حياته شقيه
حنا بخير ونعمتن مالها ثمان =شعبن سوا مانعرف الطائفية
والي يخالفنا منافق وخوان =من صحبة اشكاله ذممنا بريه
من الخليج اليا الحديثه لجيزان=شعبن سوا مابيننا عنصريه
وعندي نصيحه صدق من قلب ولسان=اقولها من تجربه واقعيه
بالرب خل الظن في كل الاحيان=بالمغفرة والرزق والعاطفيه
واحذر تنزل هامتك لايت انسان=لو سمعته ترقا على الجاذبيه
الا الثنين اهل الجمايل والاحسان=في برهم وصاك رب البريه
وليا عطيت اكرم ولا تصير منان=واحذر تجي مع درب حسنتك سيئه
ومن عاشر اهل الهون لابد ينهان=والهينه مفتاح باب الرديه
ولا تواخذ الجاهل ليا صار غلطان =ولا تتركه مابين ذيك وهذيه
ولو جتك من يمه بلا سرج وعنان=افتح لها باب على المهمهيه

يابو عوض مالي عليكم معاريف=أجي واشرف وأتشرف ياسلطان
ما صفف أعذاري للأصحاب تصفيف=واختار منها ما يناسب للأخوان
اللي يصرّف بعض الأصحاب تصريف=مذّن لكنه ما يصلي للأذان
هذاك لا تُكثر عليه التحاسيف=اليا حضر وإن غاب بالوضع (سيان)
أجي لربعي ما حسبت التكاليف=لو الصدر من (سود الأيام) مليان
لو كانت ظروفي ماجت لي على الكيف=(بنّطت) فيها لأجلك بضلع ورقان
مخلوف جهد اللي يجي للمخاليف=قبيلةٍ للعز و المجد عنوان
قبيلة الأمجاد ماهي بتزييف=يشهد لها التاريخ في عالي الشان
أهل هلا من قبل لا يقلط الضيف=يشبع من الترحيب من قلب ولسان
وليا جلس يلقى الدلال المهانيف=علط الرقاب وشاهد الوسم رسلان
والعود الأزرق قبل لا يدرج الكيف=سحاب رُبانه ماهو بأي رُبان
في مجلسٍ عامر بزين السواليف=والسالفة ما تنلطم قدر الإمكان
لاسولف اللي يوظّف الهرج توظيف=باق الجماعة مثّلوا دور بكمان
مانتفوا حمض السواليف تنتيف=لا بان رأس السالف خمّها فلان
اللي يجيهم ماشكى لاهب الصيف=اْعيونهم قبل المجالس له أوطان
لو الغلاء من قبل بالعين ما شيف=شاف الغلا بعيونهم شوف الأعيان!!
طيبٍ طبيعي ماذكر فيه تسويف=لا ما يحضر أحيان ويغايب أحيان
ثابت ماغيّرته إيدين الصواديف=لا شأن وجه الوقت بأفعالهم زان
وأسرع من النار بعلق يابس الليف=فزعاتهم لاصار شعلة ودخان
يوم إنها بالطاس والرمح والسيف=ويوم إنها بحصان وعنان وسنان
في جمعهم يا ما تفرّق مواليف=وفي ايدينهم يا ما قُطع نسل الإنسان
عدوهم ضاقت عليه المحاريف=عليه ضاق (الكون ) مع كثر الأكوان؟
أمجادهم ماهي بحاجة لتعريف=أمجادهم تسمع بها صم اللآذان
وهاذي ترى نبذة فقط للمخاليف=أقولها بالمختصر عند سلطان

احث رجلي على الجزله و اتعبها=و اتغانم الطيّبه قدام تلفيني
و الدعـوه الي من الغـالين اوجبها =ما احسب مسافاتها لو هي تعنيني

تـعنزنا بذكـر الله بـدينا بـ اسـمه الـمحمود=عليم الغيب في علمه عظيم الشان سبحانه
دعيت الهاجس الي كل ما هبت هبوب النود=يسابقني على نظم القصيد وحبّك قيفانه
دعاني داعي الي فالـمواقف ما عليهم زود=وانا سلطان اعزه و اقطع الفرجه على شانه
صميدع راس يتعب من بغا دربه وريث الجود=قوي العزم كاسب " نعم " من ربعه و ضيفانه
سفير العزوه اللي مجدهم فوق الثرى مشهود =وسبع انعام يا قوم"ن" لهم فالـمرجله خانه
شيوخ الفعل يوم الوقت ذا طارد و ذا مطرود=سنام المجد لا عدو هل الامجاد .. شيخانه
يا حرب المجد و الهيبه لأحك العود راس العود=نهار الهوش تفجع من يداحمهم بفرسانه
ومطير مطير من يجهل خبرها والفعل محمود=رجال المعجزات اللي على الأمداح خرمانه
المجد يبرك لجلهم والصعب معهم ما يكود =و القاف يصخر لجلهم و يجر بعالي الحانه
و انا من عزوة الهيلا على ممشاهم المعهود =امثل ربعي بفعلي و اسوق الشعر بعنانه

بااسم سلطان العوض راع الجزيله=كاسب النوماس شيال الثقيله
المراجل حازها من طيب راسه=مايهمه معضلات ومستحيله
مايبرك للحمول الا جملها =ولايقدم بالرجال الا الدليله
يتقدم فالمواقف وانتشرف=لاوقف في لازمه يسوى قبيله
هيلع (ن)كفه ع الطيب متعود=عقب اللي واجبه مايرتكيله
كثر الترحيب والترحيب طبعه=والطبع قد قيل ماشي(ن)يزيله
وان حضرت بماقفي مثله برحب=شاعر وارقى على راس الطويله
ماكسبت من البيوت الا الفرايد =ماني من اللي يجيبون الهزيله
مرحبا ترحيبة(ن) يبطي صداها=عد ماهلت هماليل المخيله
مرحبا ونقولها مليون مره=نعتبرها في عوايدنا قليله
مرحبا بشيوخ حرب اللي لفونا=مرحبا في كل فرد وتنثنيله
مرحبا يامطير حمران النواظر=يااهل الردات بسيوف صقيله
في حلال اللي ع العليا تعلو=ربعي مخلف منابيع الفضيله
لابة(ن) تاريخها كل(ن) درابه=مكرمين الضيف حامين الدبيله
والقبايل حقهم ماهو مهمش=مجدهم وافعالهم تبقى جزيله
والولا والسمع لااعيال الموحد =الملوك اللي تعدل كل ميله
طول الله عمر سلمان المعالي=المليك اللي مانرضى في بديله
وطول الله عمر مقرن وابن نايف=الحرار اللي تعلو بالطويله
درعنا يوم الملاقا والمجابه=كان نار الحرب شبت بالفتيله
والوفا منا على طول الليالي=مااختلف في كل يوم وكل ليله
مانساوم بالوطن والدين لله=والعدو بيموت مايبرد غليله
والحتام ان كان وان القاف قصر=عذركم غايه تبررها الوسيله