بسم الله الرحمن الرحيم

السلام عليكم ورحمه الله وبركاته

أضع بين يديكم الكريمة هذا المحاورة بين الشاعر / علي الحصني و الشاعر / معتق العياضي .. في محافظة الرس بتاريخ 18 / 8 / 1431هـ ..

الشاعر : علي الحصني

العياضي حط له سكسوكتن ما هي طويله
قلت ليه تحطه قال الرياجيل أبلشتني
قلت طوله و قال أنا ماني صاحب فضيله
نوب راسي عند جنبي و نوب راسي فوق متني

الشاعر : معتق العياضي

البلاء بالحصني اللى كل ليل يرز ذيله
القوافي لو أبيه و الله أنها ما عصتني
وش تبي في لحيتي يا راعي الكف البخيله
البلاء في لحيتك كثرت و لكن ما أقنعتني

الشاعر : علي الحصني

يالعياضي ما نذمك شاعر و تسوى قبيله
و السواه اللى تسويه مع الشعار جتني
يا حليلك و الكلام اللى تقوله يا حليله
و أن بغيت أطاك و طيت صابرك ما كلفتني

الشاعر : معتق العياضي

العياضي شاعرن ما دس راسه بالنثيله
لا غريب أصارع اللى بالمواقف صارعتني
لو بغيت أطاك يالحصني ترى الوطيه ثقيله
مير ربعي لو طيتك زعلت و ما سامحتني

الشاعر : علي الحصني

ما عليه خوف مع جيلي و معتق مثل جيله
و الحكومه شرهت معتق وأنا ما شرهتتي
يا مخلى الفرض ما داعي تصلى للنفيله
لا تقول أن الليالي قبل علمك علمتني

الشاعر : معتق العياضي

و قفتي مع جيلي اللى قلت ما تحسب قليله
و قفتك ما شرفتك و قفتي قد شرفتني
كاتب اسمي من ذهب و الله ما تقدر تزيله
لو تمر الناس بعد الناس تبطى ما محتني

الشاعر : علي الحصني

أبتلشني بالعياضي قوموا عيسى يشيله
و العلوم اللى علي بالي قريب و لا خفتني
أنت كلك من ذهب لكن ما في الامر حيله
الليالي تضحك لمعتق و انا ما ضحكتني

الشاعر : معتق العياضي

يا جماعه خير هذا علي منبوذ الفصيله
مير أنا مثل الجبل صلفاء الهواء ما حركتني